መላላ ዩሳፍዚ የመላላ ፈንድ ተባባሪ መስራች እና የቦርድ አባል ስትሆን፣ የትምህርት ዘመቻዋን የጀመረችው የ11 ዓመት ታዳጊ ልጅ ሆና ነበር፡፡ በስም አልባ ብሎጓ በመጠቀም በፓኪስታን ስዋት ሸለቆ ውስጥ በታሊባን አመራር ስር ስላለው አስከፊ ህይወትም ለቢቢሲ በሚስጥር ዘግባለች፡ በአባቷ የአክቲቪዝም ስራ የተደመመችው መላላ ብዙም ሳትቆይ ለሴቶች ትምህርት በይፋ መሟገት ጀመረች፤ ብዙ የአለም አቀፍ ሚዲያን ቀልብም መሳብ ቻለች፣ ብዙ ሽልማቶችንም አገኘች ፡፡

በይፋ ነገሮችን ደፍራ በመናገሯ ምክንያት በ15 አመቷ በታሊባን አጥቂዎች በጥይት ተመታች፡፡ በዩናይትድ ኪንግደም ከጥቃቱ ካገገመች በኋላ ለሴቶች ትምህርት መታገሏን ቀጠለች፡፡ በ2013ዓ.ም ከአባቷ ዚአውዲን ጋር አንድ ላይ በመሆን መላላ ፈንድንም መሰረተች፡፡ ከአንድ አመት በኋላ የኖብል ፕራይዝን በመሸለም ሁሉም ሴት ልጆች የ12 ዓመት ደህንነቱ እና ጥራቱ የተጠበቀ ነጻ ትምህርት እንዲያገኙ ለምታደርገው ጥረት እውቅና አገኘች፤፡ መላላ ከኦክስፎርድ ዩንቨርሲቲ በፊሎዞፊ፣ በፖለቲካ እና በኢኮኖሚክስም በመጀመሪያ ዲግሪ ተመርቃለች፡፡

ዚአውዲን ዩሳፍዚ የመላላ ፈንድ ተባባሪ መስራች፣ የቦርድ አባል እና የመላላ አባት ነው፡፡ ለብዙ አመታት በገዛ ሃገሩ ፓኪስታን  መምህር እና የትምህርት ቤት አስተዳዳሪ በመሆን አገልግሏል፡፡  ታሊባኖች በስዋት ሸለቆ የሚገኘውን መኖሪያቸውን ሲወሩ፣ ቆራጡ ዚአውዲን በሰላማዊ መንገድ የሰዎችን የግል መብት ለመገደብ የሚያደርጓቸውን እንቅስቃሴዎች ይቃወም ነበር፡፡  በይፋ ነገሮችን ሳይፈራ መናገሩ ዚአውዲንን አደጋ ውስጥ ቢጥለውም፣ ዝም ማለት ግን የባሰው አደጋ እንደሆነ ያምን ነበር፡፡ በአባቷ ምሳሌ የተነሳሳችውም መላላ፣ በይፋ ሴት ልጆች ትምህርት ቤት መሄድ እንዲችሉ የራሷን ዘመቻ ጀመረች፡፡

እንደ ፈረንጆች አቆጣጠር በኦክቶበር 2009 ዓ.ም የኒውዮርክ ታይምስ ስለዚአውዲን እና መላላ በስዋት ለሴቶች ትምህርት መሳካት ስለምታደርገው ትግል የሚያሳይ አጭር ዶክዩመንታሪ ቀረጸ፡፡ እያደገ በመጣው ታዋቂነቷ/ተደማጭነቷ የተነሳ፣ ከ2 ዓመት በኋላ መላላ በታሊባን አጥቂዎች አናቷ ላይ በጥይት ተመታች፤ ከሞት አፋፍ ተርፋም ለህክምና ወደዩናይትድ ኪንግደም ተወሰደች፡፡ ትግሉን በወኔ ለመቀጠል የወሰኑት ዚአውዲን፣ ባለቤቱ ቱር ፔካይ እና ሁለት ወንድ ልጆቻቸው መላላን በርሚንግሃም ላይ ተቀላቀሏት፡፡ በ2013 ዓ.ም፣ ዚአውዲን  እና መላላ አንድ ላይ በመሆን መላላ ፈንድን መሰረቱ፡፡ ሁለቱም በህብረት እያንዳንዷ ሴት ልጅ የ 12 አመት ደህንነቱ እና ጥራቱ የተጠበቀ ነጻ ትምህርት የማግኘት መብቷን አጥብቀው ይደግፋሉ፡፡